សេអ៊ូល៖ ប្រជាពលរដ្ឋ និងយុវជនខ្មែរព្រមទាំងពលរដ្ឋកូរ៉េមួយចំនួនបានទៅស្វាគមន៍នាយករដ្ឋមន្ត្រីកម្ពុជា សម្ដេចតេជោ ហ៊ុន សែន ដល់កន្លែងស្នាក់អាស្រ័យរបស់សម្ដេចក្នុងទីក្រុងសេអ៊ូល ប្រទេសកូរ៉េ ក្នុងពេលដែលសម្ដេចចូលរួមកិច្ចប្រជុំកំពូលសន្ដិភាពពិភពលោកឆ្នាំ២០២២។

សម្ដេចតេជោស្នាក់នៅសណ្ឋាគារឡូតេវើល នៅទីក្រុងសេអ៊ូល នៃសាធារណរដ្ឋកូរ៉េ ដែលសម្ដេចនឹងចូលរួមធ្វើជាសហប្រធាននៃកិច្ចប្រជុំកំពូលសន្ដិភាពពិភពលោកឆ្នាំ២០២២ និងទទួលពានរង្វាន់សន្ដិភាពស៊ុនហាក់ផងដែរ។

អគ្គនាយកអង្គការសហព័ន្ធសន្តិភាពសកលលោក Yun Young-Ho ប្រធានអអ្គការសហព័ន្ធសន្តិភាពសកលលោកបណ្ឌិត Thomas G Walsh ព្រមទាំងវត្តមានអស់លោក លោកស្រី នៃអង្គការសហព័ន្ធសន្តិភាពសកល រួមទាំងនិស្សិតនិងបងប្អូនជនរួមជាតិកម្ពុជាបានបង្ហាញការស្វាគមន៍ក្នុងពេលដែលសម្ដេចតេជោឈានជើងចូលសណ្ឋាគារនេះ។

នាយករដ្ឋមន្រ្តីកម្ពុជា សម្តេចតេជោ ហ៊ុន សែន បានទៅដល់ទីក្រុងសេអ៊ូល សាធារណរដ្ឋកូរ៉េ នៅម៉ោងប្រមាណ២និង៣៥នាទីរសៀលនៅប្រទេសកូរ៉េខាងត្បូង(ត្រូវនឹងម៉ោង១២និង៣៥នាទីនៅកម្ពុជា)។

ក្រសួងការបរទេសកម្ពុជាបានឲ្យដឹងថាក្នុងដំណើរទស្សនកិច្ច ៤ថ្ងៃ ទៅកាន់សាធារណរដ្ឋកូរ៉េ ក្រៅពីចូលរួមធ្វើជាសហប្រធាននៃកិច្ចប្រជុំកំពូលសន្តិភាពឆ្នាំ២០២២ និងទទួលនូវពានរង្វាន់សន្តិភាពស៊ុនហាក់។ សម្ដេចតេជោ ហ៊ុន សែន ក៏នឹងជួបពិភាក្សាការងារ ជាមួយប្រធានាធិបតីកូរ៉េខាងត្បូងលោក ម៉ូន ចេអ៊ីន អតីតអគ្គលេខាធិការអង្គការសហប្រជាជាតិលោក បាន គីមូន និងប្រមុខរដ្ឋ/រដ្ឋាភិបាលនៃប្រទេសមួយចំនួន ក៏ដូចជាទទួលសាវនាការពីសំណាក់ឥស្សរជននយោបាយ និងធុរជនផ្សេងទៀតផងដែរ៕